Përfaqësues të Nivelit të Lartë të Bankës Botërore Vizitojnë KREN-in

Dje u zhvillua takim në mes të Ministrisë së Ekonomisë dhe përfaqësuesve të lartë të Bankës Botërore, në ambientet e Rrjetit për Hulumtim dhe Edukim të Kosovës (KREN). Rrjeti i KREN-it është krijuar në kuadër të Projektit KODE në vitet 2020-2021.

Në takim, ministrja Artane Rizvanolli së bashku me drejtoreshën aktuale rajonale të Bankës Botërore për Ballkanin Perëndimor, Linda van Gelder, drejtoreshën në ardhje për rajonin e Ballkanit Perëndimor , Xiaoqing Yu, si dhe Menaxherin e zyrës së Bankës Botërore për Kosovë, Massimiliano Paolucci vizituan qendrën e të dhënave të krijuar në kuadër të KREN, si dhe u njoftuan mbi zhvillimet e fundit.

Drejtori i Projektit KODE, Agim Kukaj prezantoi shkurtimisht rrugëtimin deri në krijimin e këtij rrjeti, lidhjet e tij me rrjetin pan-Europiane GEANT, shërbimet që janë duke iu ofruar Institucioneve të Arsimit të Lartë (IAL) dhe planet e ardhshme.

Shtesë kësaj, prezent në takim ishin dhe përfaqësues të IAL, ku theksuan benefitet dhe vlerën e shtuar të përfituar nga lidhja me këtë rrjet,infrastrukturë moderne të teknologjisë së informacionit, shërbime të ndryshme dixhitale, qasje në literaturë, si edhe të ofrojë bashkëpunim në mes të institucioneve arsimore brenda dhe jashtë Kosovës.

Në kuadër të funksionalizimit të KREN, tani është duke u zhvilluar qendra e të dhënave për hulumtim dhe edukim në parkun ITP në Prizren, si dhe është duke u zhvilluar portfolio e shërbimeve që do të jetë në funksion të përdoruesve –Universtiteve dhe kolegjeve në Kosovë.

Ky rrjet së shpejti do të jetë pjesë e rrjetit akademik më të madh në Evropë, GEANT. Përmes këtij antarësimi, institucionet arsimore në Kosovë do të kenë mundësinë ekskluzive të bashkëpunimit me universitetet dhe institucionet studimore më prestigjioze në Evropë.